«Алтын минбар» фестивале конкурска гаризалар кабул итүне дәвам итә

«Алтын минбар» XXII Казан халыкара кинофестивале Татарстан башкаласы Ислам дөньясының мәдәни башкаласы дип игълан ителгән елында 4 сентябрьдән 8 сентябрьгә кадәр узачак. Сайлап алу комиссиясе рәисе Нина Кочеляева - продюсер, Яңа культурология институты директоры, Бөтенроссия дәүләт кинематография институтының кинотеатр методикаларын эшләү һәм сынау бүлегенең әйдәп баручы белгече сүзләренә караганда, конкурска бирелгән эшләрнең географиясе һәрвакыттагыча киң.

"Инде төрле номинацияләрдә 230дан артык гариза килгән: тулы метражлы уен киносы, документаль, кыска метражлы фильмнар, анимация буенча. Тәкъдим ителгән эшләрнең географиясенә килгәндә, монда, әлбәттә, Ислам төбәге илләреннән, Гарәп дөньясыннан булган эшләр күп. Элеккечә, анда барган хәрби гамәлләргә карамастан, Ираннан да кинематографистлар күп эшләрен җибәргән. Төркия, Казахстан, Таҗикстан, Һиндстан, Кытай, Филиппин, Көньяк Кореядән шактый күп гаризалар килгән. Европа илләреннән эшләр бар. Латин һәм Үзәк Америкадан берничә гариза килде, әмма алда тагын ике ай гариза кампаниясе булуын исәпкә алып, аларның саны артачак», - дип хәбәр итте Нина Кочеляева.  

«Алтын минбар» Казан халыкара кинофестивале Татарстан башкаласында 2005 елдан бирле «Мәдәниятләр диалогы аша – диалог культурасына» девизы астында уза. Фестиваль программасына, авторның диненә карамастан, игелеккә, тынычлыкка һәм гаделлеккә өндәүче илебез һәм дөнья кинематографиясенең иң яхшы фильмнары сайлап алына.

«Быел тәкъдим ителгән фильмнарда күтәрелгән темалар бөтенләй башка төрле: гаилә, этник, социаль темалар бар. Хәтта сәяси триллерлар да бар, бу, мөгаен, сәяси борылышлар белән бәйле социаль тетрәнүләр вакытында актуальдер. Һәм, әлбәттә, фестивальгә гариза биргән авторларның күбесе фестиваль регламентына йөз тота, анда төп позициядә мәдәниятара диалог тора. Быел без тамашачыларны сыйфатлы кинотасмалар белән сөендерербез дип ышанам», - диде фестивальнең сайлап алу комиссиясе рәисе Нина Кочеляева.

Фестивальнең оештыручылары билгеләп үткәнчә, «Алтын минбар»ның тагын бер миссиясе - кинематографиядә яңа исемнәр ачу. Һәм быел инде талантлы яшь авторларның фильмнары, танылган режиссерлар картиналары белән беррәттән игълан ителгән.

Исегезгә төшерәбез, конкурста катнашу өчен гаризаны 2026 елның 1 июненә кадәр электрон адреска җибәрергә кирәк. info@kazan-mfmk.com яки фестивальнең рәсми сайтында махсус анкета тутырырга http://kazan-mfmk.com/application, конкурс программасында 2024 елдан башлап чыгарылган фильмнар карала.

Фестивальнең тулы мәгълүматын һәм регламентын рәсми сайтта карап була: https://kazan-mfmk.com/about-the-festival/regulations/